Rodri Hernandez yegukanye Ballon d'Or 2024 ahigitse abarimo Vinicius Jr.

Amazina ye nyakuri ni Rodrigo Hernández Cascante usazwe ukinira ikipe ya Manchester City yo mu Bwongereza  akanakinira ikipe y’igihugu ya Espgane, yegukanye Ballon d’Or ya 2024 nyuma yo gutorwa nk’umukinnyi mwiza wahize abandi muri uyu mwaka.

Uyu muhango wo gutanga ku nshuro ya 68 ibihembo bya France Football, byabereye mu Mujyi wa Paris mu nyubako ya Theatre du Chatelet aho amazina akomeye muri ruhago y’Isi yari ateraniye muri ibi bihembo bitanga na France Football kuva mu 1956.

Mbere y’uyu munsi byari bimaze iminsi byitezwe ko Umunya-Brazil Vinicius Jr ariwe wegukana igihembo mu bagabo ariko mu masaha y’umugoroba hamenyekana amakuru y’uko atari we ndetse abategura ibi bihembo bo bavuga ko nta muntu n’umwe uzi utwara icyo mu bagabo kiba gihanzwe amaso.

Uyu mugabo wageze ahabereye ibirori agendera ku mbago kubera imvune yagize yanatumye atazongera gukina muri uyu mwaka w’imikino, ahagaze yabajijwe ibyo gutwara igihembo avuga ko nta makuru na macye abifiteho ko ari ugutegereza ibiza kuba.

N’ubwo yari avuze gutyo ariko ibyo abantu batekerezaga nyuma yo kuva mu nzira kwa Vinicius Jr niko byagenze kuko Rodrigo Hernández Bibula Cascante w’imyaka 28 y’amavuko yegukanye Ballon d’Or 2024 aho mu mwaka w’imikino 2023-2024 yakinnyemo imikino 63 mu marushanwa yose akinira ikipe y’igihugu ndetse na Man City, atsindamo ibitego 12 anatanga imipira 14 yavuyemo ibitego kuri bagenze be.

Mu bikombe ntabwo yagendeye aho kuko yafashije Manchester City gutwara igikombe cya shampiyona y’u Bwongereza 2023-2024, igikombe cy’Isi kuri Club, UEFA Super Cup, ayigeza muri 1/4 cya UEFA Champions League arenzaho guhesha Igikombe cy’u Burayi 2024 igihugu cya Espagne.

Ballon d’Or ya 2024 yari ifite umwihariko, bwa mbere kuva mu 2003 iki gihembo kitarimo Lionel Messi ufite iki gihembo inshuro umunani (2009, 2010, 2011, 2012, 2015, 2019,2021 na 2023) na Cristiano Ronaldo ugifite inshuro eshanu.

Nyuma yo kwegukana iyi Ballon d’or Rodri yavuze ko yifuje kuba yahagarika umupira w’amaguru igihe yari akiri mu myaka yo hasi gusa umuryango we ukamuba hafi, yashimiye buri wese wagize uruhare mu gutuma agera ku nzozi ze.

Ati “Mfite benshi bo gushimira harimo UEFA, France Football, umuryango, abo dukinana n’abakunzi banjye, abantoye n’abandi bose. Nkiri umwana nagiraga inzozi zo kugera ku rwego rwo hejuru. Ndashimira Manchester City kuko iyo bataba bo ntabwo mba ndi aha.”

Rodri yabaye Umukinnyi wa kabiri wa Premier League wegukanye iki gihembo nyuma ya Cristiano Ronaldo mu 2008.

Nsengimana Donatien.