Oxfam yatangaje ko  nibura abantu ibihumbi 21 ku munsi bapfa kubera inzara. Inkuru irambuye.

Abantu ibihumbi 21,000 hirya no hino ku Isi bapfa bazize inzara n’isari. Umuryango mpuzamahanga wita ku kurwanya ubukene n’akarengane (Oxfam), washyize hanze  raporo nshya ivuga ko ibibazo by’imfu ziterwa n’inzara kubera amakimbirane abera hirya no hino mu bihugu bitandukanye.

Uyu muryango ufite ikicaro mu Bwongereza raporo yabo igaragaza ko nibura  abantu bari hagati y’ibihumbi birindwi kugeza ku bihumbi 21 bashobora gupfa  umunsi ku munsi  bazize inzara mu bihugu bikigaragaramo umutekano muke.

Oxfam  yahaye izina iyi raporo iyita intambara y’ibiribwa cyangwa ‘Food Wars’ mu ndimi z’amahanga, yakozwe nyuma y’isuzuma ryakorewe mu bihugu 54 byugarijwe n’amakimbirane, igaragaza ko muri rusange abantu bagera kuri miliyoni 281.6 bafite ikibazo kiri ku rwego rwo hejuru, ko babuze icyo bashyira ku munwa.

Iyi raporo kandi  ikomeza igaragaza ko abarenga miliyoni 117 bakuwe mu byabo, bikaba byarabaviriyemo ubukene bukabije.

Emily Farr ukora muri Oxfam mu rwego rw’ibiribwa n’umutekano mu by’ubukungu yagize ati: "Mu gihe amakimbirane akomeje kwiyongera ku Isi, inzara yabaye intwaro ihitana benshi ikoreshwa n’impande zihanganye, zihonyora n’amategeko mpuzamahanga."

Amakimbirane akomeje gukaza umurego hirya no hino ku Isi, si ibibazo by’inzara ari guteza gusa, kuko agira n’ingaruka ku mihindagurike y’ikirere, ihungabana ry’ubukungu n’ubusumbane.

Mu bindi Oxafam igaragaza ko byabaye imbarutso y’inzara.

Yagaragaje ko harimo n’ibiza biterwa n’imihindagurike y’ikirere, nk’amapfa n’imyuzure, izamuka ry’ibiciro by’ibiribwa ku Isi, umwaduko w’ibyorezo bitandukanye, ndetse byumwihariko intambara y’u Burusiya na Ukraine, nayo yarushijeho kongera inzara muri Afurika y’Iburasirazuba n’Amajyepfo.