Ngororero: Umwarimu yapfuye urupfu rutunguranye.

Nyakwigendera Nsengimana Juvénal wari umurezi ku kigo cy’amashuri abanza cya Mukingi mu Murenge wa Bwira, mu karere ka Ngororero, yituye hasi imbere y’abanyeshuri ashiramo umwuka.

Amakuru ahari kandi yizewe nuko uyu nyakwigendera yagiye kwigisha ari muzima, yatangira igikorwa cyo kwigisha  akitura hasi imbere y’abanyeshuri  bikanarangira yitabye Imana.

Umuyobozi wungirije Ushinzwe Imibereho myiza y’abaturage mu Karere ka Ngororero, Mukunduhirwe Benjamini  avuga ko bamenye iby’urupfu rw’uyu mwarimu ku mugoroba wo kuri uyu wa mbere tariki ya 4 Ugushyingo 2024.

Benjamini kandi avuga ko abo bakorana bababwiye ko Nsengimana ubwo yari imbere y’abana babonye yikubita hasi bahamagaza imbangukiragutabara, ihagera yarangije kwitaba Imana.

Mukunduhirwe Benjamini  ati “Nibyo koko yapfuye, ubu nderekeza ku Ishuri ribanza rya Mukingi guhumuriza abanyeshuri n’abarimu bagenzi be bakorana.”

Nsengimana Juvénal yitabye Imana afite imyaka 50 y’amavuko, akaba yakomokaga mu Mudugudu wa Gasharu, Akagari ka Matare, Umurenge wa Macuba mu Karere ka Nyamasheke.Bitewe na gahunda z’akazi akaba yari acumbitse mu Murenge wa Bwira ho mu karere ka Ngororero.

Kugeza ubu umurambo wa Nsengimana wajyanywe mu Bitaro bya Muhororo gukorerwa isuzuma ngo hamenyekane icyatumye apfa.

Yanditswe na Nsengimana Donatien.