Irekurwa rya Uwineza Liliane: Isomo ku Bunyamwuga mu Itangazamakuru mu Rwanda.

Urwego rw’Abanyamakuru Bigenzura mu Rwanda (RMC) rwashimye irekurwa ry’umunyamakuru Uwineza Liliane wari watawe muri yombi n’Urwego rw’Igihugu rw’Ubugenzacyaha (RIB), rumusaba gukomeza kubahiriza amahame y’umwuga.

Uwineza yafashwe nyuma yo kwanga kwitaba RIB yari yamuhamagaje ngo asobanure ibiganiro yatambutsaga kuri YouTube, byashinjwaga guteza amacakubiri mu muryango nyarwanda.

Dr. Murangira B. Thierry, Umuvugizi wa RIB, yatangaje ko ibyo biganiro byakurikiranwaga kuva cyera kandi bigaragara ko bishobora kuganisha ku byaha.

Ku mugoroba wo kuri uyu wa 22 Mutarama 2025, RMC ibinyujije ku mbuga nkoranyambaga zayo, yatangaje ko yishimiye irekurwa ry’uwo munyamakuru.

Nyuma yo kugirwa inama, Uwineza yarekuwe, ibintu byakiriwe neza na RMC, ariko bongeye gushimangira ko umunyamakuru wese agomba gukora ibijyanye n’amategeko n’amahame y’umwuga kugira ngo arinde isura y’itangazamakuru, nk’uko babinyujije mu itangazo.

Itangazo ryayo rigira riti “RMC inejejwe n’inkuru y’irekurwa ry’umunyamakuru Uwineza Liliane. Tuboneyeho kwibutsa abanyamakuru bakoresha imbuga nkoranyambaga kubahiriza amahame agenga umwuga w’itangazamakuru ndetse n’amabwiriza agenga imbuga nkoranyambaga.”

Ibi byabaye isomo rikomeye ku itangazamakuru rikoresha imbuga nkoranyambaga, aho abatangiye uyu mwuga bahamagarirwa gukorera mu mucyo no kwirinda ibikorwa bishobora kwangiza amahoro n’umuco w’ubworoherane.

Kuri Uwineza, iri rekurwa ni umwanya wo kongera kwitekerezaho no guteza imbere ibitekerezo byubaka, bituma itangazamakuru ryongera icyizere mu banyarwanda no mu rwego mpuzamahanga.