Nyagatare:Abayobozi bakuru b'u Rwanda na Uganda bahuriye mu nama

Kuri uyu wa Mbere tariki ya 06 Gicurasi  mu Karere ka Nyagatare habereye inama yiswe "Rwanda and Uganda Cross Border Security Meeting" yari igamije kurushaho guteza imbere umubano mwiza hagati y'ibihugu bombi.

Iyi nama ibaye ku nshuro ya kabiri yitabiriwe n'abayobozi barimo Umunyamabanga Uhoraho muri Minisiteri y'Ububanyi n'amahanga y'u Rwanda, Clementine Mukeka na Ambasaderi Joshua Julius Kivuna ukuriye ishami ry'Amahoro  n'Umutekano muri Minisiteri y'Ububanyi n'amahanga ya Uganda.

Iyi nama kandi yitabiriwe n'abandi bayobozi barimo Guverineri w'Intara y'Iburasirazuba Pudence Rubingisa,Umuvugizi w'Igisirikare cy'u Rwanda  Brig Gen Ronald Rwivanga ndetse n'abandi bari mu nzego zitandukanye na Polisi ku ruhande rw'u Rwanda

Minisiteri y'Ububanyi n'amahanga y'u Rwanda ibinyujije ku rubuga rwayo rwa X yatangaje ko ubwo Umunyabanga Uhoraho muri Minisiteri y'Ububanyi n'amahanga  n'Ubutwererane ,Mukeka Clementine yatangizaga iyi nama yavuzeko iyi nama irushaho gukomeza ubufatanye buri hagati y'ibihugu byombi .

Ati"Ndashaka kugaruka ku kamaro k'inama y'uyu munsi no gushimangira intego duhuriyeho mu gushimangira umubano w'ibihugu byombi. kwitabira kw'abayobozi bo mu nzego nkuru bahagarariye inzego zitandukanye mu Rwanda no muri Uganda ni ikimenyetso gikomeye cyo kwiyemeza  duhiriyeho mu bijyanye no kwimakaza umubano hagati y'u Rwanda na Uganda."

Kugeza ubu umubano hagati y'u Rwanda na Uganda uhagaze neza nyuma yuko mu 2017 umubano w'ibihugu byombi wari warajemo agatotsi.

Iyi nama ibaye mu gihe umugaba mukuru w'ingabo za Uganda Gen Muhoozi Kainerugaba yagiriye uruzinduko mu gihugu cya Repubulika Iharanira Demukarasi ya Congo bikaba biteganijwe ko agomba kugirana ibiganiro na mugenzi we wa DRC Gen Christian Tshiwewe Songesa ku ngingo ijyanye n'ubufatanye mu bya gisirikare.